ຈຸດເລີ້ມຕົ້ນ
ກ່ອນທີ່ຈະມາເປັນ ສະຖາບັນການເງິນຈຸລະພາກທີ່ຮັບເງິນຝາກ ສາຍໃຍສຳພັນແຫ່ງນີ້ ໃນເມື່ອກ່ອນມີຊື່ເດີມວ່າ: ສະຫະກອນສິນເຊື່ອເພື່ອພັດທະນາຄູ ແລະ ການຜະລິດນ້ອຍ ກໍ່ຕັ້ງຂຶ້ນ ໃນວັນທີ 06 ເດືອນ 10 ປີ 2001 ທີ່ຫ້ອງສະໝຸດໂຮງຮຽມມັດທະຍົມສົມບູນໂພນສະຫວັນ ນະຄອນໄກສອນພົມວິຫານ ແຂວງສະຫວັນນະເຂດ ດ້ວຍເງິນທຶນ 100.000.000 ກີບ ຈາກແນວຄິດລິເລີ້ມຂອງພະນັກງານຄູສອນຄະນິດສາດ ທີ່ມີຈຸດປະສົງເພື່ອຊ່ວຍເຫຼືອທາງດ້ານເງິນທຶນ ໃຫ້ແກ່ພະນັກງານ-ຄູອາຈານ ຊຶ່ງໃຫ້ເງິນກູ້ເພື່ອໄປຊື້ວັດຖຸອຸປະກອນເຮັດທຸລະກິດຄອບຄົວ ໂດຍບໍ່ມີການຄໍ້າປະກັນດ້ວຍວັດຖຸຫຼືອະສັງຫາລິມະຊັບໃດໆ.
ເງິນທຶນສະຫະກອນ ແມ່ນໄດ້ມາຈາກພະນັກງານຄູ 02 ຄອບຄົວຄື:
ທ່ານ ສາຍສະໝອນ ກວານເມືອງຈັນ ກັບພັນລະຍາ ທ່ານ ນາງ ໄຍບົວ ສຸລິວົງ
ແລະ
ທ່ານ ສຳພັນໂຊກ ຣາຊພົນ ກັບພັນລະຍາ ທ່ານ ນາງ ຈັນທະບູນ ຣາຊພົນ
ຫັນປ່ຽນເປັນສະຖາບັນການເງິນ
ຈາກການເຕີບໃຫຍ່ຂະຫຍາຍຕົວຂອງສະຫະກອນສິນເຊື່ອ ເພື່ອພັດທະນາຄູ ແລະ ການຜະລິດນ້ອຍ
ມາຮອດວັນທີ 31 ກໍລະກົດ 2007 ກໍ່ໄດ້ຮັບໃບອະນຸຍາດຊົ່ວຄາວ ເປັນສະຖາບັນການເງິນຈຸລະພາກທີ່ຮັບເງິນຝາກ ສາຍໃຍສຳພັນແລະ ຖືເອົາວັນດັ່ງກ່າວເປັນວັນກຳເນີດ ສະຖາບັນການເງິນຈຸລະພາກທີ່ຮັບເງິນຝາກ ສາຍໃຍສຳພັນ ນັບແຕ່ມື້ນັ້ນເປັນຕົ້ນມາ ໂດຍສະຖາບັນມີຄຳຂວັນວ່າ: “ຊື່ສັດ ຈິງໃຈ ຊ່ວຍແກ້ໄຂ ແລະ ຫຼຸດຜ່ອນຄວາມທຸກຍາກ” ຕໍ່ມາຈຶ່ງໄດ້ຮັບໃບອະນຸຍາດຖາວອນ ຈາກທະນາຄານແຫ່ງ ສປປ ລາວ ໃນວັນທີ 18 ມິຖຸນາ 2009 ຢ່າງເປັນທາງການ ສກຈຮສສ ໄດ້ໃຫ້ບໍລິການ 15 ຕົວເມືອງ ທົ່ວແຂວງສະຫວັນນະເຂດ ມີທິດທາງພາລະກິດການດຳເນີນງານ ໄດ້ມຸ່ງເນັ້ນໄປທີ່ ການສະໜອງການບໍລິການດ້ານການເງິນ ຊຶ່ງມີ 03 ໜ້າທີ່ຫຼັກຄື: ປ່ອຍສິນເຊື່ອຂະໜາດນ້ອຍ, ຮັບຝາກເງິນ ແລະ ໃຫ້ຄຳປຶກສາທາງດ້ານການເງິນ.
ສກຈຮສສ ປະຈຸບັນ
ສະຖາບັນການເງິນຈຸລະພາກທີ່ຮັບເງິນຝາກ ສາຍໃຍສຳພັນ ໃຫ້ບໍລິການໃນ 04 ແຂວງ ມີສໍານັກງານ 05 ແຫ່ງ ປະກອບມີ:
• ສະຖາບັນການເງິນຈຸລະພາກທີ່ຮັບເງິນຝາກ ສາຍໃຍສຳພັນ ສໍານັກງານໃຫຍ່
• ຫ້ອງການໜ່ວຍເຄື່ອນໄຫວໄຫວຕະຫຼາດສະຫວັນໄຊ ສະຫວັນນະເຂດ
• ສະຖາບັນການເງິນຈຸລະພາກທີ່ຮັບເງິນຝາກ ສາຍໃຍສຳພັນ ສາຂາຄຳມ່ວນ
• ສະຖາບັນການເງິນຈຸລະພາກທີ່ຮັບເງິນຝາກ ສາຍໃຍສຳພັນ ສາຂາບໍລິຄຳໄຊ
• ສະຖາບັນການເງິນຈຸລະພາກທີ່ຮັບເງິນຝາກ ສາຍໃຍສຳພັນ ສາຂາຊຽງຂວາງ
ຫ້ອງການໜ່ວຍເຄື່ອນໄຫວຕະຫຼາດສະຫວັນໄຊ ສ້າງຕັ້ງໃນວັນທີ 15 /07/ 2010
ສາຂາ ຄຳມ່ວນ ໄດ້ຮັບອະນຸຍາດສ້າງຕັ້ງ ໃນວັນທີ 01/09/2010
ສາຂາ ບໍລິຄຳໄຊ ໄດ້ຮັບອະນຸຍາດສ້າງຕັ້ງ ໃນວັນທີ 22/12/2015
ສາຂາ ຊຽງຂວາງ ໄດ້ຮັບອະນຸຍາດສ້າງຕັ້ງ ໃນວັນທີ 25/07/2018
ໃນປະຈຸບັນມີຫຼາຍສະຖາບັນການເງິນ ແລະ ທະນາຄານ ໄດ້ຫັນມາໃຫ້ບໍລິການສິນເຊື່ອແກ່ພະນັກງານຫຼາຍຂຶ້ນ ສະຖາບັນການເງິນຈຸລະພາກທີ່ຮັບເງິນຝາກ ສາຍໃຍສຳພັນ ກໍ່ຍັງຄົງເປັນຜູ້ນຳດ້ານຜະລິດຕະພັນເງິນກູ້ສຳລັບພະນັກງານ ສາມາດສະໜອງເງິນກູ້ໃຫ້ແກ່ພະນັກງານ-ລັດຖະກອນ ໄດ້ຫຼາຍກວ່າແຫ່ງອື່ນໆ ແລະ ຍັງຄົງເຕີບໃຫຍ່ ພ້ອມຢູ່ຄຽງຂ້າງສັງຄົມລາວ ໂດຍໄດ້ປັບວິໃສທັດໃໝ່ເພື່ອໃຫ້ສອດຄ່ອງກັບສະພາບການແຂ່ງຂັນ ຊຶ່ງມຸ່ງໝັ້ນທີ່ຈະພັດທະນາບຸກຄະລາກອນ, ສ້າງການບໍລິການທີ່ມີຄຸນຄ່າ ເພື່ອສະໜັບສະໜູນການເຕີບໃຫຍ່ ແລະ ສ້າງຄຸນນະພາບທີ່ດີຂຶ້ນແກ່ສັງຄົມ ພ້ອມພັດທະນາອົງກອນໃຫ້ເຕີບໃຫຍ່ເທື່ອລະກ້າວ.